နွေပူပူနှင့် ညညအိပ်မပျော်ခြင်း ပြဿနာ
ညအိပ်မပျော်ခြင်း (Insomnia) ဆိုတဲ့ရောဂါဟာ စိတ်နဲ့ ရုပ်ခန္ဓာကျန်းမာရေးကြောင့်တင်မဟုတ်ဘဲ ရာသီဥတုဆိုတဲ့ ပတ်ဝန်းကျင်ဆိုင်ရာ သက်ရောက်မှုတွေကြောင့်ပါ ဖြစ်နိုင်ပါတယ်။ အထူးသဖြင့် ကျွန်တော်တို့ မြန်မာနိုင်ငံအတွက်ဆိုရင် နွေရာသီဟာ ညဘက်မှာ ကောင်းစွာအိပ်ပျော်နိုင်ဖို့ ခက်ခဲတဲ့ ရာသီဥတုပါပဲ။
ဘာကြောင့် နွေရာသီမှာ ညအိပ်ပျော်ဖို့ ခက်ခဲလာတာလဲ?
- ရာသီဥတု ပူပြင်းလွန်းတဲ့အခါ မကြာခဏ ချွေးစေးပြန်ပြီး ပူအိုက်နေခြင်း
- နေ့တာရှည်ပြီး ညတာတိုခြင်း
- ခရမ်းလွန်ရောင်ခြည်ဒဏ်ကို ပိုခံရပြီး အရေပြားကျိန်းစပ်နေတတ်ခြင်း
- ရေဓာတ်ပိုမိုခန်းခြောက်ခြင်း
- နေ့ဘက်တွေမှာ ပိုတစ်ရေးမှေးလာကြခြင်း
- အပူဒဏ်ဟာ စိတ်ဖိစီးမှုဝေဒနာကို ပိုဆိုးရွားစေခြင်း
- ခန္ဓာကိုယ်ကြွက်သား နာကျင်ကိုက်ခဲမှု ပိုပြင်းထန်တတ်ခြင်း
- အသက်အရွယ်ကြီးရင့်လာခြင်း
- ပူအိုက်မှုကြောင့် အဝတ်အစားနဲ့ထိကပ်နေရတာ ပိုစိတ်ရှုပ်စေခြင်း
- နွေရာသီကာလမှာ လူတွေက ပိုနိုးကြားတက်ကြွနေတတ်ခြင်း
- နှလုံးခုန်နှုန်း ပိုမြန်ခြင်း စတာတွေကြောင့် နွေရာသီကာလမှာ အိပ်ပျော်ဖို့ နည်းနည်းပိုခက်ခဲနိုင်ပါတယ်။
ဒီပြဿနာကို ဘယ်လို ထိန်းချုပ်လို့ရမလဲ
ရာသီဥတုကြောင့် ဖြစ်တဲ့ အိပ်ပျော်ဖို့ ခက်ခဲခြင်းပြဿနာကို ၁၀၀% ထိန်းချုပ်နိုင်မှာမဟုတ်ပေမဲ့ အခုပြောပြသွားမယ့် နည်းလမ်းတွေကို သေချာလုပ်ကြည့်ပြီး ကိုယ့်ရဲ့ နေထိုင်မှုပုံစံနဲ့ ပတ်ဝန်းကျင်ကို နည်းနည်းပြင်ဆင်ပြောင်းလဲလိုက်မယ်ဆိုရင် အိပ်ဖို့ ပိုလွယ်သွားနိုင်ပါတယ်။
၁။ ကိုယ့်ရဲ့အိပ်ခန်းပတ်ဝန်းကျင်ဟာ အလင်းနည်းပြီး မှောင်နေအောင် လုပ်ထားပါ။ ပြတင်းပေါက်ရှိတဲ့အခန်းဆိုရင် ကန့်လန့်ကာတပ်ထားပြီး ညဘက်အိပ်တဲ့အခါ ပိတ်ထားပေးလို့ရပါတယ်။
၂။ ကိုယ့်အိပ်ခန်းကို အသံလုံအောင် ဂရုစိုက်ပါ။ အကယ်လို့ အိမ်မှာ လူငယ်တွေ၊ ကလေးတွေရှိတယ်ဆိုရင် ညဘက်အိပ်တဲ့အခါ မလိုအပ်ဘဲ အသံမဆူစေဖို့ သေချာမှာကြားထားပါ။
၃။ မျက်လုံးအုပ်တဲ့ Eye Mask တွေကို တပ်ထားပေးပါ။ Eye Mask တွေကို နီးစပ်ရာစတိုးဆိုင်တွေနဲ့ စူပါမားကတ်တွေမှာ အလွယ်တကူ ဝယ်ယူနိုင်ပါတယ်။ Eye Mask တပ်ထားခြင်းဟာ ပြင်ပက အလင်းတွေကို ကိုယ့်မျက်လုံးထဲ မဝင်လာစေတဲ့အပြင် မှောင်သွားတဲ့အတွက် ကောင်းစွာ အိပ်ပျော်နိုင်စေပါတယ်။
၄။ ကိုယ်အိပ်တဲ့နေရာဟာ အေးမြနေပါစေ။ အိပ်ရာခင်း၊ ခေါင်းအုံးစွပ်တွေကို ချွေးစုပ်ပြီး အေးမြတဲ့ ချည်သားနဲ့ပဲ ဝယ်ပြီး အပတ်တိုင်း ပုံမှန်လဲလှယ်ပေးပါ။ လိုအပ်လာရင် ပန်ကာ၊ အဲကွန်းဖွင့်ပြီး ကိုယ့်အိပ်ခန်းကို အေးမြအောင် ထားပေးနိုင်ရင်လည်း လုံလောက်ပါတယ်။ ညအိပ်တဲ့အခါ တတ်နိုင်ရင် ချည်သားစွပ်ကျယ်၊ ဘောင်းဘီတို၊ ပုဆိုးလောက်ကိုပဲ ဝတ်ပေးပြီး အဝတ်အစားထူထူ၊ စောင်ထူထူ ဝတ်ဆင်၊ အသားနဲ့ထိတာမျိုးတွေ ရှောင်ပေးပါ။
၅။ ညဘက်ကို ပုံမှန်အိပ်ချိန် သေချာသတ်မှတ်ထားပြီး ဒီအိပ်ချိန်ဇယားအတိုင်းပဲ နေ့စဉ်အိပ်စက်နိုင်အောင် ကြိုးစားပါ။ အိပ်ချိန်ပုံသေထားခြင်းက ကိုယ့်ရဲ့အိပ်စက်မှုပုံစံကို ပိုမိုကောင်းမွန်လာစေသလို ညဘက်မှာကောင်းစွာ အိပ်ပျော်နိုင်စေဖို့လည်း ကူညီပေးနိုင်ပါတယ်။
၆။ လေ့ကျင့်ခန်းလုပ်တဲ့သူတွေအနေနဲ့ မနက်ဘက်၊ နေ့လယ်ဘက်တွေမှာ ပိုလုပ်ပေးပါ။ မဖြစ်မနေ ညနေဘက်မှာ လုပ်ချင်တဲ့သူတွေအနေနဲ့လည်း ညအိပ်ချိန်နဲ့ အနည်းဆုံး (၃) နာရီလောက်ခြားပြီး လေ့ကျင့်ခန်းလုပ်ပေးပါ။
၇။ တစ်နေ့လုံး ရေကိုပုံမှန်သောက်ပေးပြီး ညအိပ်ကာနီးမှာ ရေကိုအာစွတ်ရုံလောက်ပဲ သောက်ပေးပါ။
၈။ မလိုအပ်ဘဲ ညကိုနောက်ကျတဲ့အထိ နေတာမျိုး၊ ညဘက်တွေမှာ အစာစားတာမျိုး တတ်နိုင်သလောက် ရှောင်ပါ။
၉။ နေ့ခင်းဘက်တွေမှာ မလိုအပ်ဘဲ မအိပ်ပါနဲ့။ အစာစားတဲ့အခါ ပူစပ်လွန်းတဲ့၊ အချိုဓာတ်များတဲ့၊ ဟင်းအနှစ်များလွန်းတဲ့ အစားအစာတွေကို တတ်နိုင်သလောက် ရှောင်ပါ။ အစာအုပ်စု စုံလင်အောင် စားပေးပြီး အာဟာရမျှတဖို့ ဂရုစိုက်ပါ။
အိပ်ချိန်ထိခိုက်ခြင်းဟာ ကိုယ့်ကျန်းမာရေးကို ရေရှည်မှာ ဒုက္ခပေးနိုင်တဲ့အတွက် အိပ်စက်မှုပုံစံကို သေချာပြင်ဆင်ဂရုစိုက်ခြင်းဟာ ညဘက်မှာ ကောင်းစွာအိပ်နိုင်စေဖို့ ကူညီပေးနိုင်မှာပါ။
ရဲမျိုးမြတ်